सरकारी कागजात किर्ते गरी बैंकमा ठगी गर्ने २६ जनालाई कैद

कृषि विकास बैंक, ताप्लेजुङ शाखाबाट विभिन्न समयमा किर्ते कागजपत्र बनाइ ऋण लिने २६ जनालाई जिल्ला अदालत ताप्लेजुङले दोषी ठहर गरेको छ ।

जिल्ला अदालतले सरकारी कागजात कीर्ते बनाई बैंकबाट ऋण लिने तत्कालीन शाखा प्रमुख गणेश खतिवडा लगायत  २६ जनालाई दोषी ठहर गर्दै एक वर्ष कैद र २ करोड ४४ लाख ७५ हजार रुपैयाँ विगोको फैसला गरेको हो ।

सरकारी कागजात किर्ते गरि भीरपाखालाई प्लटिङ जग्गा देखाउँदै कृषि विकास बैंक लिमिटेड ताप्लेजुङ शाखाबाट कर्जा प्रवाह गर्ने कर्मचारी र ऋण लिने जग्गाधनी दोषी ठहरिएका छन् । जिल्ला न्यायाधीष कृपासुर कार्कीको ईजलासले आइतबार एकैदिन सोसँग सम्बन्धित ३८ थान मुद्दाको सुनुवाई गर्दै उक्त फैसला गरेका हुन् ।

जिल्ला अदालतका श्रेष्तेदार केदार प्रसाद गौतमका अनुसार बैकका तत्कालिन शाखा प्रमुख गणेश खतिवडा, लेखापाल हरिशंखर न्यौपाने, कर्मचारी भिमप्रसाद आर्चाय र जग्गाधनी पदमकुमारी नुगो मूख्य दोषी ठहर भएका छन् ।

उनीहरुलाई जनही कुल विगोको २५ प्रतिशत र अन्य सबैलाई आ–आफ्नो विगोको २५ प्रतिशत जरिवानाको फैसला भएको छ ।