ज्यान मार्ने धम्की दिएर बलात्कार

ज्यान मार्ने धम्की दिएर युवतीलाई जंगलमा लगी बलात्कार गरेको आरोपमा इलाका प्रहरी कार्यालय इटहरीले एक युवकलाई पक्राउ गरेको छ।

पक्राउ पर्नेमा खोटाङ रुपाकोट मझुवागढी-५ घर भई हाल इटहरी-८ गैसार बस्ने २१ वर्षीय विजय राई छन्।

भनेको नमाने ज्यान नै लिने र परिवारको सदस्यलाई समेत मार्ने धम्की दिएर राइले इटहरीकी एक युवतीलाई कात्तिक १० गते बिहान मोटरसाइकलमा चढाएर तरहरा जंगलमा लगेर बलात्कार गरेको प्रहरीले जनाएको छ।

तरहरा जंगलमा लगेर जबरजस्ती करणी गरेको र पीडितले लगाएको सुनको सिक्री समेत लुटेर फरार भएको जाहेरी आएपछि राईलाई पक्राउ गरिएको प्रहरीले जनाएको छ।

प्रहरीले घटनामा प्रयोग भएको को ३८ प ८५४ नम्बरको २२० सिसीको पल्सर मोटरसाइकल बरामद गरेको छ। आरोपी युवकलाई जबरजस्ती करणी अन्तर्गत मुद्धा दर्ता गरेर अनुसन्धान थालिएको प्रहरीले जनाएको छ।