धादिङमा भारतीय ट्रककाे ठक्करबाट स्कुटर चालककाे मृत्यु

धादिङकाे बेनीघाट रोराङ गाउँपालिका–५ चरौंदी पुल नजिकै आज बिहान भारतीय नम्बरको ट्रकले स्कुटरलाई ठक्कर दिँदा एक जनाको मृत्यु भएको छ भने एक जना घाइते भएका छन् ।

काठमाडौँतर्फ जाँदै गरेको बीआर ०६ जिडी ८६७१ नम्बरको भारतीय ट्रकले काठमाडौंबाट मुग्लिनतर्फ जाँदै गरेको प्रदेश ३–०२–०१४ प ३९८९ नम्बरको स्कुटरलाई ठक्कर दिँदा स्कुटर चालक सोलुखुम्बु जिल्ला मुक्ली नगरपालिका–१ का २२ वर्षीय प्रकाश बस्नेतको घटनास्थलमै मृत्यु भएको हाे ।

ट्रककाे ठक्करबाट स्कुटर मा पछाडि सवार काभ्रेका सनिष थापा घाइते भएका छन् । उनलाई उपचारका लागि काठमाडौंस्थित टिचिङ अस्पताल भर्ना गरिएको जिल्ला प्रहरी कार्यालय धादिङले जनाएकाे छ ।

दुर्घटना लगत्तै भागेका ट्रक चालकलाई गजुरी प्रहरीले पक्राउ गरी अनुसन्धान सुरु गरेकाे छ ।