एपीएफ टोलीद्वारा ५० हजार रुपैयाँ बराबरको पटाका बरामद

महोत्तरी जिल्लाको सीमा क्षेत्रबाट साउन २३ गते एपीएफ टोलीले करीब ५० हजार रुपैयाँ बराबरको पटाका बरामद गरेको छ ।

सशस्त्र प्रहरी गुल्माका डिएसपी विष्णु धितालले भारत झारखण्डको बाबाधाम पुगेर फर्किएका बोलवम सवार भाडाको जिपलाई भन्सार क्षेत्रनजिक आकस्मिक चेक गर्दा पटाका फेला परेको बताए । सबै पटाका ठूलो कार्टुनमा लुकाइएको थियो ।

तीर्थयात्राबाट फर्केका सवारीको जाँच नहुने ठानेर पटाका तस्करले समय र साधनको दुरुपयोग गरेको सशस्त्र प्रहरीको अनुमान छ । बरामद पटाका तिहार र छठलाई लक्षित गरी अहिले नै ल्याएको प्रहरीले जनाएको छ ।

जिपमा सवार बोलवम तीर्थयात्रीले पटाकाबारे अनभिज्ञता प्रकट गरेकाले सशस्त्र प्रहरीले कसैलाई पक्राउ नगरेको जनाएको छ । बरामद पटाका जलेश्वर भन्सार कार्यालयमा बुझाइएको छ ।