दाङमा बस दुर्घटना हुँदा १० यात्रु घाइते

पूर्व पश्चिम राजमार्ग अन्तर्गत दाङको रिहारमा आइतबार राति बस दुर्घटना हुँदा १० जना यात्रु घाइते भएका छन् ।

नारायणगढबाट महेन्द्रनगरतर्फ जाँदै गरेको ना ६ ख १२६४ नम्बरको बस दाङको लमहीस्थित रिहारमा दुर्घटना हुँदा १० जना घाइते भएका हुन् । घाइतेमध्ये ४ जनाको अवस्था गम्भीर छ ।

आइतबार राति रिहार नजिकै जंगलमा शाैचकाे लागी बस राेकिएकाे थियाे । तर, राेकेकाे बस आफैँ गुडेर सडक करिब १५ मिटर तल खसेर दुर्घटना भएको प्रहरीले जनाएको छ । बस राेकेर चालक पनि शाैच गर्न बाहिर निस्किएका थिए ।

गम्भीर घाइते हुनेमा कैलालीको टिकापुर ८ बस्ने ६५ वर्षीय भागीराम डगौरा, उनकी श्रीमती ६० वर्षीया बेज्या चौधरी, कैलालीकै लम्किचुहा–६ बस्ने ३५ वर्षीय कृष्ण भण्डारी र डडेल्धुरा अमरगढी २ बस्ने ५० वर्षीय गोपाल सार्की छन् ।

सामान्य घाइते भएका यात्रुको लमहीमा उपचार भैरहेको छ भने गम्भीर घाइतेलाई उपचारका लागि बाँकेको नेपालगंज लगिएको प्रहरीले जनाएको छ ।