५ जना भारतीय नागरिकले लिएको नेपाली नागरिकता रद्द

सरकारले झुटो विवरण दिएर नेपाली नागरिकता बनाएका ५ जना भारतीय नागरिकका नाममा जारी भएका नागरिकता रद्द गरेको छ ।

धनुषा, सप्तरी र रौतहट जिल्ला प्रशासन कार्यालय नागरिकता लिएका ५ जनाको नागरिकता रद्द गरिएको सरकार प्रवक्ता गोकुल बाँस्कोटाले जानकारी दिए।

धनुषाबाट नागरिकता लिएका धमेन्द्र ठाकुर र अजयकुमार ठाकुर, सप्तरीबाट नागरिकता लिएका जीवनकुमार सिंह र रौतहटबाट नागरिकता लिएका जमुना राउत भन्ने यमुना सिंह र कृपाली राउत भनी चिनिने कृपाली सिंहको नागरिकता रद्द गरिएको उनले बताए।

भारतीय नागरिकलाई नेपाली नागरिकता दिन सहयोग गर्ने अधिकारीविरूद्ध अनुसन्धान थाल्न सरकारले प्रहरी प्रशासनलाई निर्देशन दिएको छ।