नागढुंगाबाट दुई केजी सुनसहित एक पक्राउ

महानगरीय प्रहरी वृत्त थानकोटबाट खटिएको प्रहरीले लुकाईछिपाई ल्याएको करिब २ किलो सुनसहित एक जनालाई पक्राउ गरेकाे छ ।

प्रहरीले शनिबार राति भैरहवाबाट काठमाडौं आउँदै गरेको लु.२ ख ६५२ नम्बरको बसलाई जाँच गर्ने क्रममा रसुवा गोसाईकुण्ड गाउँपालिका-५ स्याप्रुवेशी घर भएका १७ वर्षीय मिन बहादुर तामाङलाई उक्त सुनसहित पक्राउ गरेको हाे ।

बसमा सवार तामाङले कालो टेपले बेरी रुमालले कम्मरमा बाँधी ६ सेमि लम्बाई र ११ सेमि मादल जस्तो गोलाई भएको सुन लुकाइछिपाई ल्याउँदै गरेको अवस्थामा प्रहरीले उनलाई पक्राउ गरेको हो ।

तामाङ रसुवा हुँदै सुन कम्बरमा बोकी गल्छीसम्म आएका थिए। गल्छीबाट उनी काठमाडौं आउँदै गरेको भैरहवाको गाडी चढेका थिए। प्रहरीले सुन सहित थप अनुसन्धानका लागि राजस्व अनुसन्धान पठाएको छ।