साइप्रस पठाइदिन्छु भन्दै ठगी गर्ने एक महिला पक्राउ

केन्द्रीय अनुसन्धान ब्यूरो महाराजगञ्जबाट खटिएकाे टाेलीले साइप्रस पठाइदिन्छु भन्दै ठगी गर्ने एक जना महिलालाई पक्राउ गरेको छ ।

ब्यूरोकाे टाेलीले साइप्रस पठाइदिने भन्दै ठगी गरेर ७ वर्षदेखि फरार रहेकी काठमाण्डौ सितापाइला निवासी ४३ वर्षीया पुनम नेपालीलाई मंगलबार सितापाइलाबाटै पक्राउ गरेको हो ।

नेपालीले वैदेशिक रोजगारीमा पठाउन पाइने ईजाजतपत्र बिना नै ६ महिनाभित्र साइप्रस पठाइदिन्छु भन्दै पीडित शान्त कुमार तामाङबाट २०६६ साल असार २९ गते १० लाख पचास हजार रुपैयाँ लगेकी थिइन् ।

तर आफूलाई साइप्रस नपठाएर पैसा ठगी गरेको आरोपमा तामाङले उनीविरुद्ध अदालतमा मुद्दा दिएकी थिइन्। अदालतले वैदेशिक रोजगार कसूर मुद्दामा वैदेशिक रोजगार न्यायाधिकरणको २०६९ असार ३१ गतेको फैसलाले पुनमलाइ पुनमलाई एक वर्ष ६ महिना कैद र १५ लाख ७५ हजार रुपैयाँ जरिवाना हुने ठहर गरेको थियो । त्यसपछि पुनम फरार भएकी थिइन् ।

बुधबार फैसला कार्यान्वयनको लागि उनलाई काठमाण्डौ जिल्ला अदालतमा पेश गरेपछि कैद भुक्तानका लागि केन्द्रीय कारागार कार्यालय सुन्धारा, काठमाण्डौमा पठाइएको ब्यूरोले जनाएकाे छ ।