भारतमा बसेर नेपाली व्यवसायीलाई धम्क्याउँदै रकम ठगी गर्ने एक पक्राउ

भारतको विभिन्न शहरमा बसेर नेपाली व्यवसायीलाई धम्क्याउँदै रकम ठगीको आरोपमा प्रहरीले एक जनालाई पक्राउ गरेको छ ।

महानगरीय अपराध अनुसन्धान महाशाखा, टेकुका एसपी केदार ढकालका अनुसार भारतको विभिन्न शहरमा बसेर नेपाली व्यवसायीलाई धम्क्याएको आरोपमा ललितपुरका ३० वर्षीय उदय गिरी पक्राउ परेका हुन् ।

गिरीले विभिन्न मितिमा नेपाली तथा भारतीय मोबाइल नम्बरको प्रयोग गरेर व्यवसायीलाई धम्क्याएका थिए ।

‘उनले ७५ लाख रुपैयाँ माग गरेका थिए’, ढकालले भने, ‘विशेष सूचनाका आधारमा पक्राउ गरेका हौं ।’ धापाखेलबाट उनलाई नियन्त्रणमा लिएर अनुसन्धान थालिएको ढकालले बताएका छन् ।

साथै उनी यसअघि हातहतियार तथा खरखजाना मुद्दामा ३ वर्ष जेल भुक्तान गरी छुटेको प्रहरीले जनाएको छ ।