व्यापारीको हत्या गर्न आएका भारतीय ‘सार्पसुटर’सहित तीन पक्राउ

प्रहरीले विराटनगरका व्यापारी जितु भनिने जितेन्द्र रायको हत्या योजनासहित नेपाल आएका सार्पसुटरसहित योजनाकारलाई पक्राउ गरेको छ ।

जिल्ला प्रहरी कार्यालय मोरङले हत्याका मुख्य योजनाकार विराटनगरका मन्नु गुप्ता, हरिनारायण झा र सार्पसुटर कुलानकुमार सिंहलाई पक्राउ गरेको हाे । मन्नु गुप्ताले लेनदेनको विषयमा विवाद हुदा विराटनगर कै व्यापारी जितेन्द्र रायको हत्या गर्न ५ लाख भारतिय रुपैयामा तीन जनालाई सुपारी दिएका थिए ।

प्रहरीले गत जेठ २७ गते विराटनगरको मेट्रोसिटी होटलबाट लोड गरिएको दुई थान पेस्तोल र सात राउण्ड गोलीसहित भारतीय नागरिक कुलानकुमार सिंहलाई पक्राउ गरेको थियो । अनुसन्धान गर्दै जाँदा करिब डेढ महिनापछि हत्या गर्ने योजनाका मुख्य योजनाकार मन्नु गुप्ता, उनका सहयोगी हरिनारायण झालाई पक्राउ गरिएको बताइएको छ ।

सो घटनामा संलग्न भारतका राकेश झा र राजु कुमार रौनियार फरार रहेको मोरङका प्रहरी उपरीक्षक विश्व अधिकारीले जानकारी दिनुभयो । पक्राउ परेका विरुद्ध हात हतियार तथा खरखजाना र संगठित अपराध ऐन अन्तर्गत मुद्दा चलाइएको छ ।