सिन्धुपाल्चोकको बाह्रविसेमा निषेधाज्ञा जारी, पाँचजना भन्दा बढी भेला हुन नपाइने

जिल्ला प्रशासान कार्यालय सिन्धुपाल्चोकले जिल्लाको बाह्रविसे नगरपालिकाका केही स्थानमा आइतबारका लागि निषेधाज्ञा जारी गरेको छ ।

प्रमुख जिल्ला अधिकारी गोमादेवी चेम्जोङ्गले जारी गरेको आदेशअनुसार चारकिल्ला भित्र हुलदङ्गा वा अशान्ति गर्ने उद्देश्यले एकै ठाउँमा पाँचजना भन्दा बढी मानिस भेला हुन नपाउने उल्लेख गरिएको छ ।

पूर्वमा बाह्रबिसे बजारबाट ३०० मिटर पूर्व, पश्चिममा भोटेकोशी खोला पुल, उत्तरमा इलाका प्रहरी कार्यालय बाह्रबिसे ४ र दक्षिणमा बाह्रबिसे बजारबाट पिस्कर जाने बाटोको सुनकोशी चोकको बीचमा पाँचजनाभन्दा बढी भेला हुन पाइने छैन ।

शुक्रबार बाह्रविसे नगरपालिका वडा नं ४ स्थित बजारमा सडक अतिक्रमण गरी निर्माण गरिएका घर टहराहरु भत्काएपछि स्थानीयहरु विरोधमा उत्रिएका थिए । विरोधमा  उत्रिएका स्थानीयहरुले शनिबार बजार क्षेत्रमा नारा जुलुस गरी नगरपालिकाको कार्यालयमा तालाबन्दी एवं केही गमला समेत तोडफोड गरेकाले यस्तो आदेश दिएको जिल्ला प्रहरी कार्यालय सिन्धुपाल्चोकले जनाएकाे छ ।