आफूलाई नेपाल प्रहरीकाे सई हुँ भन्दै ठगी गर्ने एक पक्राउ

आफू प्रहरी नायव निरीक्षक (सई) हुँ भन्दै ठगी गर्ने एक जनालाई प्रहरीले पक्राउ गरेको छ ।

पक्राउ पर्नेमा काठमाडौंकाे बसुन्धरा बस्‍ने रामेछाप मन्थली नगरपालिका २ का राजु कार्की रहेका छन् । उनलाई महानगरीय प्रहरी अपराध महाशाखाकाे टाेलीले बिहीबार बेलुकी कलंकीबाट पक्राउ गरेकाे हाे ।

कार्कीले आफू प्रहरीको सई हुँ, काठमाडौं एयरपोर्टमा कार्यरत छु र आफूसँग बैंक खातामा धेरै रकम जम्मा भएकोले कतैबाट छानबिन भएमा अफ्ठेरोमा पर्न सक्छु भन्दै आफूसँग भएको ३० लाख रुपैयाँ दिने भनी कार्कीले सिन्धुपाल्चोक हेलम्बु घर भएका एक व्यक्तिबाट ३ लाख रुपैयाँ ठगी गरेको अनुसन्धान खुलेको प्रहरीले जनाएको छ ।

कार्कीले ती व्यक्तिलाई आफूसँग भएको ३० लाख खातामा हालिदिन्छु भनी बैंक ट्रान्जेक्सन देखाउन ३ लाखको चेक काट्न समेत लगाएका थिए ।

लगत्तै ३० लाख खातामा राखिदिन्छु र एउटै शाखाबाट उक्त रकम निकाल्न मिल्दैन भनी चाबहिलस्थित नेपाल बैंकको शाखामा लगि अलपत्र छोडी नेपाल बैंक लिमिटेड, कालिमाटी शाखाबाट नगद ३ लाख रुपैयाँ निकालेका थिए ।

प्रहरीले कार्कीको साथबाट नगद ७ हजार ५ सय, बा ९१ प ७४४६ नम्बरको मोटरसाइकल, १ थान मोबाइललगायत सामग्री बरामद गरेकाे छ ।
कार्कीलाई कारबाहीका लागि महानगरीय प्रहरी परिसर काठमाडौं पठाइएको महाशाखाले जनाएकाे छ ।

कार्की यसअघि २०७३ सालमा पनि ठगी मुद्दामा ६ महिना भुक्तान गरी धरौटीमा छुटेका थिए ।