बिना पास उपत्यका प्रवेश गर्न खाेज्ने तीन सवारी साधन नियन्त्रणमा

पास नलिएरै काठमाडौं उपत्यका प्रवेश गर्न लागेका सार्वजनिक सवारीसाधनलाई प्रहरीले नियन्त्रणमा लिएको छ ।

लकडाउनको नयाँ मोडालिटीको नियम पालना नगरी प्रवेश गर्न खोजेपछि नेपालगञ्ज र झापाबाट आएका तीनवटा बस र एउटा हाइससहित चालकलाई नागढुंगा नाकाबाट नियन्त्रणमा लिइएको महानगरीय ट्राफिक प्रहरी महाशाखाले जनाएको छ ।

नेपालगञ्जबाट काठमाडौंतर्फ आउँदै गरेको बा.४ ख ४५८० नम्बरको हाइस गाडीका चालक बाँके, नेपालगञ्ज उपमहानगरपालिका-६ घर भएका २६ वर्षीय राहुल डबगर, झापाबाट काठमाडौं आउँदै गरेको ना.५ ख ५८३४ नम्बरको यात्रुवाहक बसका चालक सुनसरी पानमरा नगरपालिका-२२ घर भएका ४० वर्षीय राकेश शाक्य र नेपालगञ्जबाट काठमाडौंतर्फ आएको ना.७ ख ७३९५ नम्बरको यात्रुवाहक बसका चालक बाँके खजुरा गाउँपालिका-२ बस्ने ३४ वर्षीय रुद्रबहादुर खत्रीलाई नियन्त्रणमा लिइएको महाशाखाले जनाएको छ ।

लकडाउनको मौकाको फाइदा उठाएर सार्वजनिक बसहरूमा विना पास बढी भाडा लिई काठमाडौँ उपत्यका भित्रिदै गरेको सूचनाको आधारमा चेकजाँच गर्दा बस र चालकलाई नियन्त्रणमा लिइएको महाशाखाका प्रहरी उपरीक्षक वामदेव गौत्तमले जानकारी दिए ।