भान्जाको अपहरणपछि हत्या गरेर फरार अभियुक्त १३ वर्षपछि पक्राउ

आफ्नै भान्जाको अपहरण पश्चात हत्या गरेर फरार भएका एकजना भारतीय नागरिकलाई प्रहरीले १३ वर्षपछि पक्राउ गरेको छ ।

पक्राउ पर्नेमा भारतको सितामणी जिल्ला मुजप्फरपुरस्थित आखाडाघाट घर भएका ४५ वर्षीय राजेश कुमार गुप्ता रहेका छन् । उनलाई महानगरीय अपराध महाशाखाको टोलीले सर्लाहीको मलंगवाबाट  शनिबार पक्राउ गरी काठमाडौं ल्याएर आइतबार पत्रकार सम्मेलनमार्फत सार्वजनिक गरेको हो ।

काठमाडौंको खिचापोखरी बस्‍ने राई स्कुल जोरपाटीका कक्षा ७ का विद्यार्थी रोहितकुमार गुप्ताको २०६४ असोज २४ गते अपहरणपछि हत्याग गरेर उनी फरार भएका थिए।

ती बालक साँझ ५ बजेको समयमा घरबाट बाहिर निस्किएको अवस्थामा अपहरणमा परेका थिए। त्यसपछि गुप्तासहितले टेलिफोनमा बालकका बुवा वासुदेव गुप्तासँग छोरा अपहरणमा परेकाे र छोरा छुटाउन भन्दै २ लाख ५० हजार फिरौती मागेका थिए।

रोहितका बुबाले सो रकम बुझाएर पनि उनका छाेरा अपहरण मुक्त भएका थिएनन् । बरु त्यसको ३ दिनपछि असोज २७ गते  बालको शव कमलादीस्थित गणेश मन्दिर सडक पेटीमा फेला परेको थियो । अभियुक्तले हत्यापछि शव भरियालाई बोकाएर कमलादीको सडकमा लगेर फ्याकिदिएकाे अनुसन्धानकाे अनुसन्धानकाे क्रममा खुल्न आएकाे प्रहरीले जनाएकाे छ ।

घटनामा धादिङका विष्णु सुनारको समेत संलग्नता रहेको खुलेपछि प्रहरीले २०६४ मंसिर १२ गते नै पक्राउ गरेको थियो भने उनी हालपनि कारागारमै रहेका छन् ।