आफ्नै पसलमा चोरीको नाटक गरी बीमा दाबी गर्न खाेज्ने पक्राउ

मकवानपुरमा आफ्नै पसलमा चोरी गर्ने एक जनालाई प्रहरीले पक्राउ गरी सार्वजनिक गरेको छ ।

हेटौंडा उपमहानगरपालिका वडा नम्बर ४ पारिजात पथमा रहेको घिमिरे ईलेक्ट्रिक एण्ड ईलेक्ट्रिोनिक सेन्टरमा चोरी गर्ने सोही पसलका सञ्चालक उमेश घिमिरेलाई प्रहरीले पक्राउ गरेको हो ।

बैंकबाट लिएको ५० लाख रुपैयाँ ऋण तिर्ने भाका सार्ने र पसलको विमा दाबी गर्ने उद्देश्यले चोरीको नाटक गरेको खुलेको हो ।

जिल्ला प्रहरी कार्यालय, मकवानपुरमा ८ जेठमा घिमिरेको पसलमा ३२ लाख ९३ हजार रुपैयाँ बराबरको मालसामान चोरी भएको भन्दै निवेदन परेको थियो ।

तर, अनुसन्धानका क्रममा सञ्चालक आफै संलग्न रहेको फेला पारेको हो ।

घिमिरेले प्रहरीलाई १७ लाख ३० हजार १ सय ७२ रुपैयाको ३१ बोरा वाईरिङको तार, एलइडी बल्ब, एलईडी बत्ती, पंखासहित केही नगद समेत गरी करिब ३२ लाखकाे धनमान चोरी भएको भन्दै प्रहरीमा उजुरी गरेका थिए ।

अनुसन्धान टोलीले चोरी भएको भनिएको ३१ बोरा वाईरिङको तार ८ गतै नै काठमाडौंको पाटीबाट डेलीभरी लिएको भनिएकोमा उक्त सामानको डेलिभरि नै नलिएको, पसलमा नगद नै नरहेको, पसलबाट चोरी भएको भनिएको अन्य इलेक्ट्रोनिक सामान उनले नै हेटौंडा उपमहानगरपालिका ४ पारिजात पथमा देवेन्द्र सापकोटाको घरमा कोठा लिई निजले लुकाइराखेको अवस्थामा फेला पारेकाे थियाे ।

अनुसन्धानका क्रममा घिमिरेले चोरी हुनु केही दिनअघि मात्र सिद्धार्थ इन्स्यूरेन्स लिमिटेडमा पसलको विमा गरिएको खुलेको थियो । जुन दाबी गर्नसमेत घिमिरेले चोरीको नाटक गरेको देखिएको प्रहरीले जनाएको छ ।

प्रहरीले यस विषयमा थप अनुसन्धान भइरहेको बताएको छ ।