जनमुक्ति सेनाबाट समायोजन भएका यमबहादुर बने सहायक रथी

सरकारले तत्कालिन नेकपा माओवादीका जनमुक्ति सेनाबाट नेपाली सेनामा समायोजन भएका यमबहादुर अधिकारी‘प्रतीक्षा’ लाई सहायक रथी (ब्रिगेडियर जनरल) मा बढुवा गरेको छ ।

मंगलबार बसेको मन्त्रिपरिषद बैठकले अधिकारीलाई सहायक रथीमा बढुवा गरेको हो ।

सञ्चार तथा सूचना प्रविधिमन्त्री एवं सरकारका प्रवक्ता गोकुलप्रसाद बाँस्कोटाले पद सिर्जना गरेर अधिकारीलाई सहायक रथीमा पदोन्नति गरिएको बताउनुभयाे ।

अधिकारीलाई सहायक रथी बनाउन जंगी अड्डाको सिफारिसमा रक्षा मन्त्रालयले मन्त्रिपरिषद्मा प्रस्ताव गरेको थियो ।

शान्ति प्रक्रियाको केही काम अझै टुंगोमा पुग्ने अवस्थामा रहेकाले मनोबल गिर्न नदिन सरकारले यस्तो निर्णय गरेको हुनसक्ने सैनिक अधिकृतहरु बताउँछन् ।

दुई जनाको महासेनानीमा बढुवा

मन्त्रिपरिषदको सोही बैठकले दुई जना प्राविधिक सेनानीलाई महासेनानीमा बढुवा गरेको छ ।

बढुवा हुनेमा बानिरा थापा र अमुल कार्की ढली छन् ।